حصريا عامود وان طال السفر لي محمد عبد الماجد يوميا علي المنتدي

< الاخوة في منديات (كورة سودانية) ...عندهم الكثير من الالقاب النافذة التي تخرج من عندهم وترتبط بالشخص ارتباطا وثيقا.

< حتي ان (اللقب) اذا خرج منهم يصبح اكثر انتشارا وتداولا من (الاسم) الحقيقي.

< وهذا دليل (صدق).

< الرئيس (الشفت) لقب اطلقه اعضاء منتدي كورة سودانية علي رئيس نادي الهلال (السابق) صلاح احمد ادريس.

< ورغم استقالة صلاح ادريس من رئاسة نادي الهلال إلا ان اللقب مازال نافذا في الوسط الرياضي.

< ربما لأن احساس الجميع ان صلاح ادريس مازال رئيسا لنادي الهلال وان استقال.

< وبقي صلاح ادريس او رحل من مجلس ادارة نادي الهلال يبقي اتفاقنا مع الاخوة في منتدي كورة سودانية بوجود اسم صلاح ادريس ضمن قائمة الرؤساء (الشفوت).

< (الشفتنة)...عند (الاوس) الطلوع في رأس البيت ...(يا فيها يا نطفيها).

< اطفيها...نحن مالنا!!.

< شداد طفاها.

< ولعت.

< انا ابوك يا عائشة.

< والشفتنة عند (الصاقعاب)..الخروج من المشكلة زي الشعرة من العجين.

< هو وينو العجين.

< وهي عند (الوصيفاب) مسح الايميل.

< يمسحوا (الايميل) ويمشوا في جنازتو.

< وعند (العويكاب) وهم شعب (معارض) ...نوع من الاعارة الوهمية.

< خايف بكرة يقولوا لينا (قرار الفيفا) دا وهمي.

< والتجميد وهمي.

< انتوا عملتوا ليكم (جمعية عمومية) في سوق الناقة ما بتجيبها حقها ..جمعية (فضيحة) عديل.

< ما قلتوا فيها أي شيء.

< عادي عندكم.

< ايميل ...عملتوا لينا فيه قومة وقعدة.

< سنة مدورين في الموضوع دا.

< ما سكين لينا في (وهمية).

< والايميل اتمسح.

< اها هسع الحكاية بقي فيها (تجميد).

< تجميد عديل.

< المادة 16 من لائحة قانون 2003 ما قلتوا فيها أي شيء.

< المهم دي (شفتنة) شدادية ما عندنا معاها شغلة.

< شداد ذاتو شفت ...والله يا معتصم جعفر بعد كدا مفروض تشوف ليك (ايميل) تمسحوا.

< او اعارة.

< اقول ليكم حاجة.

< اعيروا معتصم جعفر الي (ليبيا).

< يمكن ينفع هناك.

< يا معتصم كلامك في عالم الرياضة ...طلع كلام ساكت.

< وعمتك الملفوفة ذاتها طلعت عمة في الفاضي.

< محمد سيد احمد بكون قفل التلفون.

< سيف الدين الطيب ...بكون رمي (الشريحة).

< بالله سيف الدين الطيب تفتح أي قناة تلقي بصرح فيها.

< تفتح الجرايد تلقاه قاعد.

< في زول عاقل كدا بطعن في شداد.

< شداد ما بطعن في المفوضية ...شداد بطعن في (الفيفا).

< في الفيل عديل.

< نرجع لفصول (الشفتنة).

< الشفتنة دي عندها 90 معني.

< لو مسكتها ليكم ..ما بتتفكوا مني.

< وانا عارفكم (مستعجلين).

< أي زول مستعجل بقول ليك ...لاحق لي زول قبل ما يطلع من الشغل.

< قبل الساعة اتنين.

< الساعة اتنين هسع ذنبها شنو؟.

< قالوا ليك في عزابة بنوموا متأخرين.

< ما بنوموا قبل اربعة.

< يدوروا (كشاتين) من تسعة.

< اربعة يقوموا واربعة يقعدوا.

< حريقهم بقول يا غربتي.

< كل خميس بشتروا ليهم (كراس) دبل ...عشان يسجلوا فيها (الكدايس).

< العزابة ديل ...مرة في حرامي تلب ليهم في البيت الساعة اثنين.

< الحرامي جاهم بدري ساكت ...الساعة اتنين جماعتك بكونوا يا دوب في (الكديسة) الاولي.

< الزول الحرق عاين للحرامي كدا وقال ليه : انت مالك جيت بدري كدا ...لاحق شنو؟...عاوز تسرق ليك (بنك)...اقعد ..اقعد ..ألعب ليك (عشرة) معانا وقوم شوف شغلك.

< يمين بيتنا دا لو قلبتو قلب ما بتلقي ليك غير (كيس تمباك).

< ان بالغت كدا بتلقي ليك (حبتين بندول).

< اكتر من كدا ما بتلقي حاجة.

< الحرامي (اتوقنع) وقعد يلعب ليك معاهم (كوتشينة).

< الحرامي كيشة ...كلو مرة يقبضوا ليك بي (14) ورقة.

< دا حرامي شنو؟.

< ومرات كمان ورقوا بكون زايد.

< في واحد من الجماعة قال ليه : انت يا اخوي كنت بتسرق (جداد) شنو كلو مرة قابضنك بي (14) كرت.

< تاني لو قبضناك بي (كرت) واحد بنوديك كشك بسط الامن الشامل بتصرفوا معاك.

< نحن ما عندنا زول بدخل البيت دا وبكون ما بعرف يلعب (حريق).

< هسع الموضوع دا ما في داعي ليه.

< نرجع لموضوع (الشفتنة).

< الشفتنة عند (الوارغاب)...خلطة من عسل الدوم مع ورق النبق.

< جابت ليها (نبق) كمان.

< هسع النبق ذنبو شنو؟.

< قصر الكلام صلاح ادريس (شفت)...وكمال شداد (شفت)...نحن ما عندنا هلالابي ما شفت.

< ناسنا ديل كلهم (شفوت).

< كمال شداد دا انتوا قايلين شعروا دا واقف ساكت.

< شعرو دا واقف بي فهم.

< الفيفا كلها في شعرو دا.

< هيع.

< نحن أي حاجة عندنا بي نظام.

< السيرة الذاتية للدكتور معتصم جعفر.

< عمل في الاتحاد العام كامين خزينة لمدة 3 سنوات.

< وعمل معتصم جعفر كنائب لرئيس الاتحاد العام لكرة القدم السوداني لمدة 3 سنوات.

< وعمل معتصم جعفر لمدة 8 ايام كرئيس لاتحاد كرة القدم السوداني.

< طيب انجازات معتصم جعفر في رئاسة اتحاد كرة القدم السوداني شنو؟.

< هو لحق.

< هو شاف فيها حاجة.

< رئيس لمدة 8 ايام.

< معتصم جعفر عمل اجتماع واحد...ولا اتهنا بيها.

< انجازات معتصم في الـ 8 ايام دي ...الهلال صعد لمرحلة المجموعات في البطولة الكونفدرالية.

< لكن نحن (الكونفدرالية) دي ما بنفرح بيها.

< ولا بنشتغل بيها.

< كدا يا معتصم جعفر شوف ليك حاجة تانية.

< معتصم جعفر صلاح ادريس قبل عليه (طعون) في المفوضية ...وكمال شداد طعون في (الفيفا).

< يعني خارجي ومحلي.

< معتصم جعفر داخليا لم ينجح احد.

< معتصم جعفر خارجيا برضو لم ينجح احد.

< ينجح وين مع (الشفوت) ديل.

< ديل (الشفتنة) عندهم طبع.

< الشفتنة دي ولا بتلفتوا فيها.

< شفتنتهم مع الريق.

< صلاح ادريس رئيس شفت بالجد.

< جمال الوالي المحترف الاجنبي اول حاجة بعملها ليها بسلمو (الجنسية) السودانية.

< صلاح ادريس المحترفين (قروشهم) ما بديها ليهم ...لو حس ان (المحترف) بلف ويدور.

< بتلتلهم جنس تلتلة.

< لكن يا كلتشي احسن ما يدوك قروش وتكون احسن لاعب في القارة ..وإلا افضل ليك يدوك قروش وما تلعب حاجة.

< عملتها لينا كلها (نيوكاسل) تقول بتحضر في الدكتوراة.

< دكتوراة يعملوا بيها شنو ...في (اللخمة) دي.

< الناس ديل ما ناس (شهادات).

< ديل ناس اقوان عديل.

< قلت ليكم ديل (شفوت).

< قعدتوا تغالطوا ...السنة كلها تغالطوا.

< صلاح ادريس (شفت).

< امبيلي ..قلب اسمو وبقي اسمو (عمر) ودخل للاسلام ..بعد هذا تم (تجنيسه).

< بعد دا كلو ..صلاح ادريس قال ليه ..لو ما لعبت كويس ...بنطفشك (ليبيا).

< جمال الوالي احضر (وارغو) بـ 5مليون دولار.

< ليه ...اصلوا هو (كوبري).

< سد مروي نحن ما خسرنا فيه القروش دا.

< يا وارغو تعرف انت لو سعرك ارتفع شوية ..يمكن تولد (كهرباء) عديل.

< علي شوية تجيب (الكهرباء).

< 5 مليون دولار يا وارغو عشان تهدف لينا في (الكشافات).

< نحن ناقصين.

< انت المحترف بتعمل كدا ...طيب (بلة جابر) يعمل شنو؟.

< بلة جابر هسع ذنبو شنو؟.

< يهدف في الكشافات ويعاين لي اقدامو.

< سلامة النظر.

< خلاص يعني (مقطعها).

< انت قايل التهديف في الكشافات صعب.

< انت فاكر الموضوع دا (بديع).

< يا بديع انت.

< موسي الزومة ...ممكن يهدف في (الكشافات).

< صعبة دي كمان.

< طيرت المريخ من كل البطولات ...وقعدت.

< طيرتهم من سيكافا.

< وطيرتهم من بطولة الاندية الافريقية للابطال.

< وطيرتهم من الكونفدرالية.

< ومن كأس السودان.

< ومن الممتاز....وقاعد.

< طلعتهم من كل البطولات ...وقت ناس جمال الوالي عاوزين (يطلعوك) اعارة غلبهم.

< جمال مشي...ووارغو قاعد.

< والله وارغو دا يخليكم كلكم (تتنحوا).

< التنحية القادمة علي (همد).

< بعد همد ...قريش.

< اصبروا يا جماعة ...نحن أي حاجة عندنا بي نظام ما تضيقوا.

< انتوا عارفين لي (وارغو) دا لو كان بيلعب في الهلال (بعيد عنكم) كان حصل شنو؟.

< صلاح ادريس كان اعارو الي (اهلي شندي).

< هسع وارغو كان بيلعب مع ناس موسي عليو.

< وناس شندي (صعبين).

< أسألوني منهم انا.

< والله يا وارغو لو هدفت ليهم في (الكشافات) ..إلا ياكلوك أكل.

< بعتبروها حقارة ...كيف يعني تهدف في (الكشافات).

< والعجب لو قعدت تعاين لي (كرعينك).

< بقطعوا ليك (كرعينك).

< جايبنك بي 5 مليون دولار عشان تقعد تعاين لينا في كرعينك.

< الكلام دا ناس شندي ما بقبلوا منك.

< (كشافاتهم) ما بتقبل الكلام دا.

< انتوا عارفين اول حاجة ناس شندي كانوا عملوها في وارغو شنو.

< كانوا (جلدوه).

< الاربعين جلدة دي..في (الفاصل الاول) من الحفلة بدوها ليك.

< كمان ناس شندي بتلفتوا.

< هيع.

< صلاح ادريس دا وقت عاوز يمشي من الهلال عملها ظريفة.

< بطريقة ما يشعر بيها زول.

< عمل نفسو ماشي الاتحاد.

< زول سألو ما في.

< مالو ..بنتمني ليه كلو خير.

< انسحب من الهلال بطريقة ظريفة ...والهلال في احسن حالاتو...ما عندنا أي مشكلة.

< والطريق مفتوح لصلاح ادريس عشان يرجع في أي وقت للهلال او يواصل مسيرته بعيدا عن الهلال.

< وصلاح ادريس بعيد من الهلال هو قريبا منه.

< لكن تعالوا شوفوا جمال الوالي.

< عملها لينا كلها (تنحيات).

< بتتنحي ليه انت؟.

< في حد يتنحي في الظروف دي يا عالم.

< تتنحي بعد شنو؟.

< الطابق التاني نحن نعمل بيه شنو؟.

< نودي وين مع بطولات الهلال دي؟.

< ملحوظة: ان شاءالله تقلبوا (كشك عصير).

هوامش

< بشة شكلو كدا بمشي (الفيفا).

< اقوانو دي ...ما اقوان نصاح.

< قولوا ما شاءالله.

< القون اول حاجة بدخلوا (فوفنة).

< واحد اختلف مع نسباتو...هدد يواصل الموضوع للفيفا.

< النسابة طوالي (رخو).

< واحد تاني.

< ما دفع ايجار البيت.

< سيد البيت ..قال ليه بوصل الموضوع دا للفيفا.

< زولكم دفع.

< 15 يوم يا جمدوها.

< نحن ممكن نضحي بالكونفدرالية.

< ونضحي بالبطولة الافريقية وكأسها.

< لكن اهلية وديمقراطية الحركة الرياضية ما بنجامل فيها.

< ولا بنكذب.

< خبر عاجل : فيفا وخراب بيوت.